ბიზნესი
14/07/2020

როგორი იქნება ახალი საოფისე სივრცე "ვაკე პლაზა“

თბილისში, ჭავჭავაძის გამზირზე N72ა-ში  მრავალფუნქციური  სივრცე  „ვაკე პლაზა“ შემოდგომაზე გაიხსნება. როგორც „ბიზნესპარტნიორთან“ საუბარში პროექტის ხელმძღვანელმა რუსუდან ჩერგოლეიშვილმა განაცხადა, aხალ საოფისე სივრცეში შესაძლებელი იქნება როგორც ოფისების ქირაობა, ისე არაფორმალური შეხვედრების გამართვა.

პროექტში 20 მილიონი აშშ დოლარის ინვესტიცია ხორციელდება.

ჩერგოლეიშვილის ინფორმაციით, სამშენებლო სამუშაოები კორონავირუსის გამო რამდენიმე თვით შეჩერებული იყო, თუმცა, ამ ეტაპზე მშენებლობა აქტიურ ფაზაშია შესული.

„სექტემბერში ყველა ტიპის სამუშაო დასრულდება, დარჩება მხოლოდ დამქირავებლის სურვილის მიხედვით შიდა კოსმეტიკური რემონტების ეტაპი“,- აცხადებს ჩერგოლეიშვილი.

მისი განცხადებით, კერძო კომპანიების მხრიდან ინტერესი დიდია. ფართის ქირაობა ნებისმიერ მსურველს შეუძლია. კვადრატულის ფასი კი 22 დოლარია.

„ვაკე პლაზა“ 11-სართულიანი იქნება და მისი ფართი ჯამში 22 000 კვადრატულ მეტრს შეადგენს. სპეციალურად ავტოფარეხისთვის მიწისქვეშ  გამოყოფილი იქნება  4 სართული, ჯამში 11 000 კვადრატული მეტრი.

შეგახსენებთ, „ლიბერთი თაუერის“ გვერდით მდებარე შენობა წლების განმავლობაში  ყოფილ და ახლანდელ მეპატრონეს შორის სასამართლო დავის გამო  კონსერვაციის რეჟიმში იყო. გავრცელებული ინფორმაციით, წარსულში შენობის ერთ-ერთი პარტნიორი თავდაცვის ყოფილი მინისტრი დავით კეზერაშვილი იყო.

 

 

Businesspartner

მთავარი სიახლეები