ატმის ექსპორტი 40%-ით შემცირდა
ატმის ექსპორტი შემცირებულია. 6 ივლისის მონაცემებით, ატმისა და ვაშლატამას (ნექტარინი) საექსპორტო მაჩვენებელი 1 397 ტონაა, მაშინ როდესაც 2019 წლის ამ დროისთვის უცხოეთის ბაზრებზე 3 624 ტონა ატამი გავიდა.
გარემოს დაცვისა და სოფლის მეურნეობის მინისტრი ამბობს, რომ პანდემიით შექმნილი გამოწვევების მიუხედავად, ატმის მოსავლის აღების, ჩაბარებისა და რეალიზაციის პროცესი შეუფერხებლად მიმდინარეობს.
ლევან დავითაშვილის შეფასებით, წელს ერთ-ერთი ყველაზე წარმატებული სეზონია. პროცესიც შეუფერხებლად მიმდინარეობს, ფასებიც მაღალია და ფერმერებიც კმაყოფილები არიან.
ატმისა და ვაშლატამას წლევანდელი საპროგნოზო მოსავალი კი 35 ათასი ტონაა. დაბინავების პროცესში 20 სამაცივრო მეურნეობაა ჩართული. ატმის ჩაბარების ფასი 1,00 - 1,50 ლარია, ვაშლატამასი კი, 1,40 – 2,00 ლარი.
სამინისტროს მონაცემებით, პროცესში საქართველოს სხვადასხვა კუთხიდან ჩასული მოქალაქეები არიან დასაქმებული, საკოორდინაციო შტაბი კი აქტიურად მუშაობს, რათა იმპორტიორებს შემოსვლის პრობლემა არ ჰქონდეთ.
