"ინტრეკ ჯორჯია" კომპოზიტური არმატურის მწარმოებელ მეორე ქარხანას გახსნის

კომპოზიტური (მინაპლასტიკური) არმატურის მწარმოებელი კომპანია „ინტრეკ ჯორჯია“  წელს   მეორე ქარხანას გარდაბანში, სოფელ ნორიოში გახსნის.

როგორც „ბიზნესპარტნიორს“ კომპანიის დამფუძნებელმა რომა ფირცხალავამ განუცხადა, კომპანიას 3 000 კვ.მ მიწის ფართი უკვე შეძენილი აქვს და ახლა სამშენებლო ნებართვის გაცემის ინსტანციებს გადის.

მისი განცხადებით, პროექტში დაახლოებით $500 000-ის ინვესტირება იგეგმება, აქედან $200 000 მშენებლობაზე იქნება მიმართული, დანარჩენი კი - მანქანა-დანადგარების შეძენაზე.

„მშენებლობა წელს აუცილებლად დაიწყება.ახალი ქარხანა მინაპლასტიკური არმატურის გარდა მისთვის საჭირო ბადესაც გამოუშვებს,“-აცხადებს ფირცხალავა.

კომპანიამ „ინტრეკ ჯორჯია“  მინაპლასტიკური არმატურის წარმოება  2014 წელს დაიწყო. კომპანიის არსებული  საწარმო თბილისში, გლდანში მდებარეობს.