ლანჩხუთში წელს საგზაო ინფრასტრუქტურის მოწყობაზე ₾6.5 მლნ დაიხარჯება
ლანჩხუთში მიმდინარე წელს საგზაო ინფრასტრუქტურის მოწყობაზე ჯამში 6.5 მლნ ლარი დაიხარჯება. როგორც ლანჩხუთის მუნიციპალიტეტის მერმა ალექსანდრე სარიშვილმა „ბიზნესპარტნიორს“ განუცხადა,ამ ეტაპზე ქალაქში 8 ქუჩის მოწესრიგება - მოასფალტება მიმდინარეობს,რაშიც დაახლოებით 3 მლნ ლარამდე იხარჯება.
პროექტი 3 თვეში დასრულდება და ის რეგიონებში განსახორციელებელი ფონდიდან ფინანსდება.
გარდა ამისა, საავტომობილო გზების დეპარტამენტთან მიმდინარეობს მუშაობა, რათა მოხდეს სუფსა - წყალწმინდის 5 კილომეტრიანი გზის მონაკვეთის მოწყობა. პროექტში ჯამში 3.6 მლნ ლარი დაიხარჯება.
„ეს არის ყოფილი ცენტრალური გზა. აღნიშნული გზით ისარგებლებს დაახლოებით 11 სოფელი და მოსახლეობას მოძრაობას გაუადვილებს. რაც ყველაზე მნიშვნელოვანია - 11 კილომეტრიდან 5 კმ-მდე შეამცირებს დასაკავშირებელ მანძილს,“-აცხადებს სარიშვილი.
მისივე განცხადებით, გამზადებულია, თუმცა, დაფინანსების წყარო ამ ეტაპზე მიღებული არ არის 4 მილიონი ლარის ღირებულების პროექტზე,რომელიც სოფლებში შიდა გზების მოწესრიგებას გულისხმობს.
