ზურაბ ვადაჭკორია: ჩვენ გვაქვს ექიმის მომზადების ამერიკული პროგრამა, რომელსაც ანალოგი არ აქვს რეგიონში
სამედიცინო განათლების სფეროში, ჩვენი ფასი ყველაზე მაღალია საქართველოში და არა მხოლოდ საქართველოში, ჩვენ გვაქვს ისეთი ფასი საერთაშორისო სტუდენტებისთვის, რომელიც აღემატება ევროკავშირის ქვეყნების უნივერსიტეტების ფასებსაც კი, - ამის შესახებ „ბიზნესპარტნიორს“ თბილისის სახელმწიფო სამედიცინო უნივერსიტეტის რექტორმა ზურაბ ვადაჭკორიამ განუცხადა.
მისი თქმით, მაღალ ფასს განაპირობებს სწავლის ხარისხი.
„მიუხედავად მაღალი ფასისა, ჩვენს უნივერსიტეტში უცხოელი სტუდენტების რიცხვი ყოველწლიურად მზარდია. ამას ვუკავშირებთ განათლების უმაღლეს ხარისხს, რომელსაც მათ ვაწვდით და ასევე, მრავალფეროვან პროგრამებს. მაგალითად, ჩვენ გვაქვს ექიმის მომზადების ამერიკული პროგრამა, რომელსაც ანალოგი არ აქვს რეგიონში და ეს დიდ ინტერესს იწვევს.
გარდა ამისა, თბილისის სახელმწიფო სამედიცინო უნივერსიტეტის მიმართ გაზრდილ მოთხოვნას განაპირობებს ჩვენი კურსდამთავრებულების წარმატებები, რომლებსაც ისინი არა მხოლოდ თავიანთ ქვეყნებში, არამედ მთელ მსოფლიოში აღწევენ“, - განმარტა ზურაბ ვადაჭკორიამ.
მისივე თქმით, თბილისის სახელმწიფო სამედიცინო უნივერსიტეტი განათლების ექსპორტს აკეთებს და დღეს უკვე, მისი ცნობადობა ძალიან მაღალია მთელ მსოფლიოში.
ამჟამად თბილისის სახელმწიფო სამედიცინო უნივერსიტეტში 81 ქვეყნის წარმომადგენლები სწავლობენ. პროგრამების ძირითადი ნაწილი ინგლისურენოვანია, მცირე ნაწილი და კი - რუსულენოვანი (ყოფილი საბჭოთა ქვეყნებიდან ჩამოსული სტუდენტებისთვის).
საერთაშორისო სტუდენტების სიმრავლით თბილისის სახელმწიფო სამედიცინო უნივერსიტეტი გამოირჩევა, რომელმაც უცხოელი სტუდენტების მოზიდვა ჯერ კიდევ 1996 წლიდან დაიწყო, ხოლო 2009 წლიდან ამ დრომდე, მათი რიცხვი თითქმის 18-ჯერ გაზარდა.
