Aston Martin-ის აქციების 20%-ის მფლობელი Mercedes-Benz-ი გახდება

2023 წლისთვის Mercedes-Benz ბრიტანული Aston Martin-ის აქციების 20%-ის მფლობელი გახდება, რაც კომპანიას ბრიტანული ავტომწარმოებლის ერთ-ერთ უმსხვილეს აქციონერად აქცევს.

BBC-ის ინფორმაციით, Mercedes-ი წილს 5%-დან 20%-მდე ეტაპობრივად გაზრდის. 

გამოცემის ცნობით, კომპანიებს შორის 2013 წელს გაფორმებული ხელშეკრულება გაფართოვდება. შედეგად Aston Martin-ს Mercedes-ის მთავარ ტექნოლოგიაზე, მათ შორის ჰიბრიდულ და ელექტროძრავის სისტემებზე წვდომა ექნება.

ჯეიმს ბონდის საყვარელი ავტომობილის სახელით ცნობილი Aston Martin-ი 2025 წლისთვის გაყიდვების 10 000-მდე გაზრდას გეგმავს, რაც გასული წლის მონაცემებს თითქმის 2-ჯერ აღემატება.