ნატო ტორონჯაძე STRONG WOMEN IN IT GLOBAL-ის 200 ლიდერ ქალს შორის მოხვდა
ნატო ტორონჯაძე Strong Women in IT Global Edition-მა ტექნოლოგიების სფეროში 200 ლიდერ ქალს შორის დაასახელა.
ტექნიკისა და დანადგარებით ვაჭრობის ყველაზე დიდი ონლაინ მარკეტის Bizon.ge-ს დამფუძნებელი, ნატო ტორონჯაძე "ბიზნესპარტნიორს" საკუთარ გამოცდილებას უზიარებს. მისი თქმით, იმისთვის რომ ბიზნესში, სტარტაპში ან თუნდაც ნებისმიერ საქმიანობაში წარმატებას მიაღწიო, ძალიან მნიშვნელოვანია გაიზიარო სხვა ადამიანების გამოცდილება, ასევე გააზიარო შენი მიგნებები.
"ტექ-ინდუსტრია, იგივე ტექ-სტარტაპერობა გამოწვევებითაა სავსე, განსაკუთრებით ქალებისთვის, რადგან სამწუხაროდ დღესაც მათ ნაკლები წვდომა აქვთ დაფინანსებასთან, ინვესტიციებთან და ვენჩურულ კაპიტალისტებთან. ასეთ დროს ძალიან მნიშვნელოვანია სხვა ქალების გვერდში დგომა და რწმენა რომ ეს შენ გარდა სხვასაც გამოუვიდა, მანაც გადალახა ბარიერები. ვფიქრობ ეს არის მთავარი სიძლიერე ამ პროექტის-ცოცხალი მაგალითები და მათი ისტორიები."–აღნიშნავს, ნატო ტორონჯაძე.
