სოფლის მეურნეობა
25/01/2023
მოსავლის ამღები ტექნიკის თანადაფინანსების პროგრამაში განაცხადების მიღება იწყება
სოფლის განვითარების სააგენტოს ინფორმაციით, მოსავლის ამღები სასოფლო-სამეურნეო ტექნიკის თანადაფინანსების პროგრამაში განაცხადების მიღება 1 თებერვლიდან დაიწყება.
თანადაფინანსების მოცულობა შეადგენს: კომბაინის შემთხვევაში - ღირებულების არაუმეტეს 40%-ს და 200,000 ლარს, სხვა სასოფლო-სამეურნეო ტექნიკის შემთხვევაში − არაუმეტეს 40%-ს და 150,000 ლარს, ჩაის ხელის საკრეფი ტექნიკის შემთხვევაში − არაუმეტეს 50%-ს და 500 ლარს.
პროგრამა ითვალისწინებს მხოლოდ მოსავლის ამღები სასოფლო-სამეურნეო ტექნიკის თანადაფინანსებას, როგორც თვითმავალის, ასევე მისაბმელის.
შესასყიდი სასოფლო-სამეურნეო ტექნიკა უნდა იყოს ახალი (ექსპლუატაციაში არ მყოფი), კერძოდ, უნდა აკმაყოფილებდეს შემდეგ ორ პირობას:
- სასოფლო-სამეურნეო დანიშნულების ტექნიკა წარმოებული უნდა იყოს შესყიდვამდე არაუმეტეს ორი კალენდარული წლით ადრე.
- სასოფლო-სამეურნეო დანიშნულების ტექნიკაზე საგარანტიო პირობები უნდა ვრცელდებოდეს განაცხადის წარდგენიდან არანაკლებ 6 თვის ვადით.
სააგენტოს ინფორმაციით, 2023 წლის ბიუჯეტი შეადგენს 7,000,000 ლარს, აქედან არაუმეტეს 3,600,000 ლარი მოხმარდება კომბაინებს დაფინანსებას, ხოლო დარჩენილი ბიუჯეტი სხვა მოსავლის ამღები ტექნიკის თანადაფინანსებას.
