როგორია სასტუმროებისთვის საბანკო კრედიტების თანადაფინანსების პირობები
სასტუმრო ბიზნესის საბანკო კრედიტების თანადაფინანსების პირობები ცნობილია.
მთავრობის დადგენილებით, 1 მარტიდან 6 თვით სესხის წლიური საპროცენტო სარგებლის თანადაფინანსებით ისარგებლებენ 4-დან 50-მდე ნომრის მქონე სასტუმროები.
პროგრამას ახორციელებს სააგენტო „აწარმოე საქართველოში“ ბანკებთან გაფორმებული ხელშეკრულების ფარგლებში.
თანადაფინანსების მისაღებად საჭირო კრიტერიუმებად განისაზღვრა:
- ბანკის მიერ მეწარმე სუბიექტისთვის დამტკიცებული სესხი 1 მლნ ლარამდე, უცხოურ ვალუტაში გაცემული სესხების შემთხვევაში − 300 000 დოლარს ან 250 000 ევრო.
- ბანკის მიერ მეწარმე სუბიექტზე სესხი გაცემული უნდა იყოს 2020 წლის 1 მარტამდე;
- მეწარმე სუბიექტსა და ბანკს შორის გაფორმებული სესხის ხელშეკრულების მიზნობრიობა უნდა იყოს სასტუმროს მშენებლობა/გაფართოება/აღჭურვა/რემონტი/რეკონსტრუქცია.
თანადაფინანსებით ვერ ისარგებლებენ სახელმწიფო პროგრამის ის ბენეფიციარები, რომელთანაც სააგენტოს მხრიდან არ არის დასრულებული ამ დადგენილების შესაბამისად სესხის პროცენტის თანადაფინანსების 24-თვიანი პერიოდი.
ასევე თუ სესხი ბანკის მიერ 2020 წლის 1 მარტამდე პერიოდში პრობლემურ კატეგორიაშია კლასიფიცირებული.
დაფინანსებისთვის მეწარმემ მდგომარეობის შესაფასებლად ბანკს უნდა მიმართოს, ბანკმა კი სააგენტოს.
სააგენტო 6 თვით დააფინანსებს ყოველთვიური საპროცენტო განაკვეთიდან:
− 80%-ის ოდენობით, ეროვნულ ვალუტაში გაცემულ სესხებზე; 70%-ით, უცხოურ ვალუტაში გაცემული სესხებზე.
